У адзiнстве наша сiла
Пад такім дэвізам у гарадскім Цэнтры культуры і вольнага часу прайшло тэатралізаванае літаратурна-музычнае прадстаўленне для школьнікаў.
Яно было прысвечана Дню народнага адзінства і будавалася на аснове літаратурна-драматычнага матэрыялу пра ўз’яднанне Беларусі і адзінства беларускага народа.
У ліку арганізатараў мерапрыемства — Магілёўская абласная арганізацыя Беларускага фонда міру і Магілёўскае абласное аддзяленне Саюза пісьменнікаў.
У даступнай форме, праз вершы і песні магілёўскіх аўтараў, класікаў Прыдняпроўскага краю, навучэнцы дзіцячай школы мастацтваў №1, Магілёўскага дзяржаўнага каледжа мастацтваў і самі аўтары данеслі моладзі, што адзінства беларускага народа нараджаецца ў душы чалавека.
Адкрыў мерапрыемства старшыня праўлення Магілёўскага абласнога аддзялення Беларускага фонда міру Андрэй Нікіцін. Ён пажадаў навучэнцам міру ў душы, каб яны паважалі сваіх бацькоў, шанавалі памяць продкаў, любілі сваю краіну і вывучалі яе гісторыю.
— Важна захоўваць векавыя традыцыі свайго народа і памятаць, што наша сіла – ў адзінстве, – падкрэсліў Андрэй Аляксандравіч.
Для магілёўскіх школьнікаў пісьменнікі падрыхтавалі насычаную і пазнавальную праграму па сваіх творах.
Да прыкладу, навучэнцы Магілёўскага дзяржаўнага каледжа мастацтваў прадэманстравалі ўрывак паэмы Алеся Казекі «Медуніца», а ўзорны харэаграфічны ансамбль «Дывертысмент» і ўзорная тэатральная студыя «У кропку!» прадставілі пластычную кампазіцыю «Памяці спаленых вёсак».
Свае вершы прачытаў Віктар Кунцэвіч, а Валянціна Габрусева выканала «Вальс маладосці».
Старшыня Магілёўскага абласнога аддзялення Саюза пісьменнікаў Беларусі Аляксандр Казека ў сваім выступе адзначыў, што ўсе яго творы напісаны на аснове рэальных фактаў з жыцця беларускага народа.
Дзень народнага адзінства – свята хоць і маладое, але вельмі значнае для беларусаў. Яно сапраўды аб’ядноўвае людзей, і гэта немагчыма не адчуваць. У грамадстве адчуваецца згуртаванасць, агульнасць поглядаў і інтарэсаў.
Каму, як не моладзі мы павінны расказваць, што такое Дзень народнага адзінства, як ён узнік і навошта гэтае свята?
Андрэй Нікіцін,
старшыня Магілёўскага абласнога аддзялення
ГА “Беларускі фонд міру”