ЗВАРОТ БЕЛАРУСКАГА ФОНДА МІРУ
АД ІМЯ БЕЛАРУСАЎ ДА ЛІДЭРАЎ ЗАХОДНІХ ДЗЯРЖАЎ І КІРАЎНІКОЎ МІЖНАРОДНЫХ АРГАНІЗАЦЫЙ
ПА ПЫТАННІ АБ НЕПРАВАМЕРНАСЦІ ЎЖЫВАННЯ
САНКЦЫЙ ДА БЕЛАРУСІ
Прыняты на пасяджэнні Праўлення грамадскага аб’яднання “Беларускі фонд міру” 4 жніўня 2022 г., Нацыянальная бібліятэка Беларусі, г.Мінск
Накіраваны:
Прэзідэнту Злучаных Штатаў Амерыкі Джо Байдэну;
Прэм’ер-міністру Злучанага каралеўства Вялікабрытаніі і Паўночнай Ірландыі Борысу Джонсану;
Прэзідэнту Францыі Эмануэлю Макрону;
Федэральнаму канцлеру Германіі Олафу Шольцу;
Генеральнаму сакратару ААН Антоніу Гутэрэшу;
Старшыні Еўрапейскай камісіі Урсулі фон дэр Ляйен;
Генеральнаму сакратару АБСЕ Хельзе Марыі Шміт;
Вярхоўнаму Прадстаўніку ЕС па замежных справах і палітыцы бяспекі — Намесніку Старшыні Еўрапейскай Камісіі Жазэпу Барэлю.
Ваша экселенцыя!
Да Вас звяртаецца Беларускі фонд міру.
Наша грамадскае аб’яднанне з’яўляецца найстарэйшай міратворчай арганізацыяй Беларусі. Мы не з’яўляемся палітычнай арганізацыяй і не фінансуемся дзяржавай. У дзейнасці Фонда міру прымаюць удзел больш за 1 000 000 беларусаў, у тым ліку прадстаўнікі 156 нацыянальнасцей і 25 рэлігійных канфесій. Таму мы звяртаемся да Вас ад імя грамадзянскай супольнасці Рэспублікі Беларусь.
На працягу больш за 60 гадоў Беларускі фонд міру аб’ядноўвае ў сваіх шэрагах прадстаўнікоў усіх прафесій і ўсіх слаёў насельніцтва нашай краіны, людзей розных узростаў і веравызнанняў. У склад кіраўніцтва арганізацыі ўваходзяць кіраўнікі ўсіх рэлігійных канфесій Беларусі.
Наша дзейнасць накіравана на ўвасабленне ў жыццё простых і важных для кожнага чалавека ідэй: міру, сяброўства, узаемаразумення, згоды, згуртавання народаў. Кожны дзень мы маем справу з інтарэсамі розных людзей. Сёння мы лічым важным стаць транслятарам меркаванняў простых беларусаў, чые паўсядзённыя клопаты далёкія ад глабальных і геапалітычных задач.
Ваша экселенцыя!
Мы хочам звярнуць Вашу ўвагу, што Беларусь не з’яўляецца бокам канфлікта паміж Расіяй і Украінай. Нягледзячы на гэта, да Беларусі прыменены ўвесь арсенал санкцый.
Гісторыя паказвае, што рэжым санкцый не прыносіць таго выніку, які прагназуюць іх ініцыятары і ідэолагі. Асноўны ўдар ад санкцый прыпадае на простых людзей: пагаршаецца якасць жыцця, людзі страчваюць працу, разбураюцца сем’і, пакутуюць дзеці. Беларусы адзіныя ў меркаванні аб несправядлівасці ўвядзення санкцый у дачыненні да нашай краіны.
Нягледзячы на ўвесь ціск, Беларусь, па-ранейшаму, застаецца краінай-міратворцам і разглядае сітуацыю ва Украіне з пункту гледжання важнасці дапамагчы людзям, якія сталі ахвярамі канфлікту. Мірныя грамадзяне Украіны, якія ўцяклі ад ваенных дзеянняў у Рэспубліку Беларусь, знайшлі тут не толькі дах над галавой і хлеб, але і верных надзейных сяброў. Яны забяспечаны ўсім неабходным. Пры жаданні ўкраінцы могуць застацца ў нашай краіне для пастаяннага пражывання.
Таму, працуючы ва ўсіх кутках Беларусі, мы часта чуем ад людзей словы здзіўлення, чаму Беларусь спрабуюць усяляк уцягнуць у канфлікт.
Беларускі фонд міру – грамадская арганізацыя, для якой тэма нераспаўсюджвання ядзернай зброі мае асаблівы сэнс. Мы лічым неабходным адзначыць наступнае.
5 снежня 1994 г. у г.Будапешце на Саміце АБСЕ сусветная супольнасць прыняла на сябе абавязкі, а кіраўнікамі дзяржаў Вялікабрытаніі і ЗША быў падпісаны Мемарандум аб гарантыях бяспекі ў сувязі з далучэннем Рэспублікі Беларусь да Дагавору аб нераспаўсюджванні ядзернай зброі. Беларусь стала першай дзяржавай, якая адмовілася ад магчымасці валодання ядзернай зброяй без усялякіх папярэдніх умоў і агаворак. Гэта рашэнне было прадыктавана настроямі беларускага грамадства, народа Беларусі.
Вялікабрытанія і ЗША далі Беларусі гарантыі незалежнасці, тэрытарыяльнай цэласнасці і суверэнітэту, абавязаліся ўстрымлівацца “ад эканамічнага прымусу, накіраванага на тое, каб падпарадкаваць сваім уласным інтарэсам ажыццяўленне Рэспублікай Беларусь правоў, уласцівых яе суверэнітэту”. Мы дзякуем Вам, што Ваша краіне ўзяла на сябе гэтыя абавязкі і вельмі спадзяемся, што яны будуць выкананы.
Лічым, што санкцыйная палітыка супраць Беларусі супярэчыць гуманізму і, кажучы словамі Будапешцкага мемарандума, з’яўляецца “механізмам эканамічнага прымусу”.
Беларусы абвяргаюць любы гвалт. Мы вельмі зацікаўлены ў хуткім урэгуляванні сітуацыі ў блізкай для нас краіне і спадзяемся на найхутчэйшае прымірэнне паміж канфліктуючымі бакамі.
У такі складаны для ўсіх час мы заклікаем не ўзмацняць напружанне, уводзячы новыя санкцыі супраць нашай краіны, адмяніць усе раней уведзеныя санкцыі, а таксама забяспечыць выкананне ўзятых на сябе Будапешцкіх абавязкаў.
Просім Вас, Ваша экселенцыя, у інтарэсах усеагульнага міру і згоды зрабіць усе магчымыя крокі для пераходу ад аднабаковых механізмаў санкцыйнага ціску да мірных дыпламатычных спосабаў вырашэння канфліктаў.
Са свайго боку, пры неабходнасці, мы гатовы выступіць міратворчай пляцоўкай і ўдзельнічаць пры правядзенні перагавораў па розных пытаннях.
З павагай,
Старшыня праўлення грамадскага аб’яднання «Беларускі фонд міру»
Максім Місько